Gasteizko Lan Arloko Epaitegiak legez kanpokotzat jo du Arabako hiriburuko autobus zerbitzu publikoa ematen duen konpainiako (Tuvisa) zuzendaritzak bere langileei ezarritako aldi baterako lana erregulatzeko espedientea. Enpresa batzordeak eskatu du erregulazioa kentzeko eta berehala itzultzeko ohiko zerbitzuen %100era. Halaber, ordaindu gabeko soldata «guzti-guztiak» ordaintzeko eskatu du.
Komunikabideetara bidalitako ohar batean, ELA sindikatuak udalaren «kudeaketa negargarria» salatu du, eta Amaya Barredo konpainiaren kontseiluko presidentearen eta Marijo Ajuriaguerra kudeatzailearen dimisioa eskatu du. «Enpresako zuzendaritza osoa berehala kargutik kentzeko eskatzea beste irtenbiderik ez dago».
Langileen batzordeak gogorarazi duenez, «garraio publikoaren sektoreko enpresa bakarra» izan da aldi baterako enplegu erregulazioa ezarria duena. Salatu du horren bidez bere gastuak finantzatu nahi izan dituela.
