Erregulazio espedienteak apaldu egin dira 2015ean: 695 bildu ditu Eusko Jaurlaritzak, aurreko urtean baino %52 gutxiago; 1.434 jaso zituen orduan. Guztira, 8.108 langileri eragin diete erregulazio txostenek: 5.718 langileri kontratua aldi baterako eten diete (iaz baino %53 gutxiagori), 1.530i lanaldia jaitsi diete (-%52), eta kalean geratu dira beste 860 (-%41).
Araban, Bizkaian eta Gipuzkoan 75 lan erregulazio dosier izenpetu zituzten iragan abenduan. Azaroan baino %103 gehiago, baina 2014an hilabete berean baino %39 gutxiago. Eusko Jaurlaritzako Enplegu Sailak emandako datuen arabera, 1.050 langileri eragin diete dosierrek. Horietatik 760ri behin-behinean kontratua eten diete; 227ri lanaldia murriztu diete; beste 63ak, ordea, kaleratu egin dituzte.
Lehen sektorean dosierrik ez
Sektorez sektore begiratuta, aurreko hilabeteetako joerari eutsi diote datuek. Zerbitzuen sektorean egon ziren lan erregulazio espediente gehien (%45,04); industria sektorean izan dira %39,14, eta eraikuntzan %15,40. Lehen sektorean, berriz, abenduan ez zen erregulazio dosierrik sinatu.
Gaur-gaurkoz, 406 espediente daude indarrean Araba, Bizkai eta Gipuzkoan, eta 3.563 langileri eragiten diete. Eusko Jaurlaritzak, orotara, 695 erregulazio dosier jaso ditu 2015ean, eta jakinarazi du gehientsuenak Arabako Lautadan, Bilbo Handian eta Donostialdean izenpetu dituztela.
