Gemma Zabaleta
Eusko Jaurlaritzako Lan sailburua«Estatu osoa dago atzeraldi ekonomikoan, baita Euskadi ere, eta munduan ez da herrialderik atzeraldian enplegua sortzeko gai denik. Datu bakoitzaren atzean langabezia sufritzen duten pertsonak daude, eta haren ondorioak beti dramatikoak eta kezkagarriak dira. Guk ere, gobernu gisa, sufritu egiten dugu».
Lourdes Goikoetxea
Nafarroako Lan sailburua«Datuek erakusten dute lan erakusleak oso ahulak direla Nafarroan. Langabe gehiago daude, baina datu on gisa aipa dezakegu enplegua pixka bat sortu dela aurreko hiruhilekoarekin alderatuz gero. Aurreikuspenak ez dira onak denbora laburrera. Ekonomikoki oso urte gogorra da, eta kostatuko da enplegua handitzea».
ELA
«Enpleguaren bilakaera txarra gobernuek egiten dituzten politiken ondorio zuzena da. Lan arloko eskubideen galera ekartzen duten erreformak, eta gero eta larriagoak diren murrizketa sozialak ari dira onartzen etengabe. Begi bistakoa da enpleguak eta gizartearen ongizateak ez dutela lehentasuna gobernatzen gaituztenentzat».
LAB
«Gaur egungo krisi ekonomikoari lan erreforma eta murrizketa sozialak gehitzeak ekonomia suspertzeko zantzu guztiak zapuzten ditu. Lan erreformaren ondorio kaltegarriena kaleratzeak erraztea zen, eta bete dute helburua. Lanpostuen galera hori buka dadin, oso garrantzitsua da PPren erabakiei emango diegun erantzuna».
