Nafarroako Gobernuak Espainiako Gobernuaren lan erreformako hiru artikuluren aurka jarritako helegitea atzera bota du Espainiako Auzitegi Konstituzionalak. Horrela, babesa eman die lan erreformaren zutarrietako batzuk direnei.
Ekintzaileentzako kontratuak, esaterako, kalte-ordainik gabeko kaleratzeak onartzen ditu lehen urtean; auzitegiaren arabera, hori ez da Konstituzioaren kontrakoa. Itun kolektiboetan egindako aldaketen kontra ere agertu zen Nafarroako Parlamentua, baina Konstituzionalak atzera bota dio helegitea.
Konstituzionalaren osoko bilkuran hartu dute erabakia: bederatzi boto izan dira helegitearen aurka, eta hiru alde. Erabakia partziala da; auzitegiak oraindik beste hainbat helegite ditu aztertzeko, lan erreformari dagokionez.
Otsailean, PPren dekretuaren edukia legezkoa dela esan zuten Konstituzionaleko zazpi epailek, erreformari oniritzia emanez: 2012ko otsailean gobernuak onartutako lan erreforma legezkoa dela ebatzi zuen auzitegiak, hala forman —dekretu bidez onartu izana— nola edukian.
