Espainiako Diputatuen Kongresuak finantza erreforma onartu du. Aldeko 303 boto, aurkako 28 eta 6 abstentzio izan dira.
Dekretua lege proiektu bezala tramitatzea ez dute onartu, 336 diputatuetatik 183 aurka agertu baitira.
Erreakzioak
EAJk bat egin du finantza erreformaren ildo orokorrekin baina kutxei dagokienez autonomi erkidegoen eskudantziak murriztuko ez direla argitzeko eskatu dio Gobernuari.
Amaiur, aldiz, erreformaren aurka agertu da eta salatu du PPren gobernuaren helburua finantza erakunde handien boterea bermatzea dela, "kutxak desagertarazten dituen bitartean". Rafa Larreina Amaiurko diputatuak adierazi du bankuek ez dutela euren arriskuen erantzunkizunik bere gain hartzen eta, hala ere, erakunde publikoek bankuei laguntzen dietela.
Horregatik, Larreinak Euskal Herriarentzako finantza sistema propio baten alde egin du; "gizartearen errealitateari lotuta egongo den eta ekonomia jardun produktibo bat bultzatuko duen" banku publiko baten beharra azpimarratuz.
