Estres azterketak, kotoiaren proba

•Zer dira estres testak? Finantza erakundeek zer-nolako sendotasuna duten neurtzeko tresna da. Baldintza ekonomikoek okerrera eginez gero aurre egiteko duten gaitasuna neurtzen du.

•Zein hipotesi aplikatu zaizkie? Europako Batzordeak espero dituenak baino hazkunde apalagoko testuinguruak: eurogunean, BPGaren %0,5eko jaitsiera aurten eta %0,2koa datorren urtean; Europako Batasunaren kasuan, berriz, aurten %0,4ko uzkurtzea eta hazkunderik ez 2012an.

•Eta Espainiari eta Frantziari? Espainiari, bi urteko atzeraldia —aurten BPGaren %1ekoa eta datorren urtean %1,1ekoa—, langabezia tasa %22,4ra arte igotzea aurten, etxebizitzak %22 merkatzea bi urtean eta zor bonuengatik ordaindu beharreko interes tasa oinarrizko 165 puntu igotzea. Frantziari, berriz, ekonomia aurten %0,4 eta datorren urtean %0,2 haztea eta langabezia tasa aurten %9,6koa eta 2012an %9,4koa izatea.

•Erakundeek beren egoera hobetzeko hartutako neurriak kontuan izan al dituzte?Aurtengo estres testetan, ez. Iaz aintzat hartu zituzten, eta zenbait finantza erakundek gero ez zituzten lortu planetan iragarritako emaitzak.