Etengabe ari da gora egiten Iberdrolaren balioa burtsan; %35 handitu da urtea hasi zenetik. Atzo marka berria ezarri zuen —9,44 euroraino heldu ziren Iberdrolaren akzioak— eta Europako merkatuak itxitakoan baieztatu zen albistea: Stoxx 50 indizean sartu zen Iberdrola, hemezortzi herrialdetako 50 konpainia handienen artean. Bizkaiko konpainiak 60.000 milioi euroko balioa gainditzen duen lehen aldia da.
Azken urteetan Iberdrolak hainbat herrialdetara zabaldu du bere jarduna —AEB, Mexiko, Brasil eta Erresuma Batua—, eta adituek gustuko dute hori. Bizkaiko enpresak ekonomia sendoa du, eta, gainera, fruituak ematen ari da, eta aspalditik ari da energia berriztagarrien alde egiten.
Iberdrola sartzearekin batera, BBVA irten da Stoxx 50 indizetik. Bankuaren balioa %7,7 txikitu da, interes tasa txikiek eragindako testuinguruak sortzen dituen zalantzak direla eta.
Atzo iragarri zituzten arren, irailaren 23an gauzatuko dira aldaketak.
