Jean Claude Trichet Europako Banku Zentraleko (EBZ) presidenteak berriro esan du gaur: "Beharrezkoa da estatuek defizita jaistea eta neurriak hartzea. Hori da gure mezu nagusia". Hala, uztailaren 21ean euroguneko gobernuek onartutako plana "ahal den azkarren" betetzeko eskatu du.
Tricheten arabera, orain arte neurriak hartu izan ez balira, "merkatuetako gaurko krisia" lehen mundu gerratik izandako "larriena" litzateke.
Europe 1 Frantziako irrati kateko elkarrizketan adierazi duenez, "nazioarteko ekonomiarengan konfiantza arazo handia" dago egun. "Azkeneko lau urtean ari gara tentsioa bizitzen", eta uste du "gauza askoren ondorioz" ari dela gertatzen hori.
