Finantza krisiaren kontra hartutako neurriek herritarrengan, industrian eta enpresetan ere eragin beharko lukete: finantza erakundeek gobernuen eskutik diru publikoa jasoz gero, herritarrei eta enpresei uzteko moduan izango dira; eta interes tasak jaitsita, beren arteko diru maileguen merkatua berpiztuko dela espero da.
Nicolas Sarkozy Frantziako presidenteak modu argigarrianazaldu zuen beren ahalegina: «Ez gara Monopoly-an jolasten ari. Bankuen porrotak saihestuz herritarrak eta enpresak babesten ari gara».
Hala ere, hori ez da nahikoa, eta bestelako neurriak ere behar dira. Angela Merkel Alemaniako kantzilerrak argi utzi zien gainerako buruzagiei: «Ekonomia erreala atzeraldirantz doa, eta, beraz, neurriak hartu behar dira». Frank-Walter Steinmeier Alemaniako Atzerri ministroak esan zuen bileran aztertu egin zutela industria eta enpresak laguntzeko programa bat sortzeko aukera, baina ekimena oraindik landu gabe dagoela.
Alemaniako Gobernuak berak atzo murriztu egin zuen bere ekonomiaren 2009rako hazkundearen aurreikuspena, %1,2tik %0,2ra. «Beheranzko lehen joerak ikusten ari gara ekonomiaren zikloan», esan zuen Michael Glos Alemaniako Ekonomia ministroak.
Ameriketako Estatu Batuetako datuak ere kezkagarriak dira. Bertako industria produkzioa %2,8 jaitsi da irailean, 38 urtean izan duen jaitsierarik handiena. Urtebetean, %4,5 jaitsi da, eta hirugarren hiruhilekoan, %0,6.
Xehekako salmentek, berriz, %1,2 egin dute behera. AEBetan xehekako salmentak dira salmenta guztien herena, eta kontsumitzaileen gastuaren ia erdia.
Europan burtsak behera
Ekonomiaren egoeraren eta etorkizunari buruzko zalantzen ondorioz, Europan burtsek galerak izan zituzten atzo ere: Parisko CACk %5,9 galdu zuen, Londresko FTSEk %5,3, Frankfurteko Daxek %4,9 eta Madrilgo Ibex 35ek %4,11. AEBetan, atzo, bertako ekonomiaren datu txarrak jakinarazi arren, Wall Streeteko Dow Jones indizea galerak eta irabaziak tartekatzen ibili zen saio osoan.
