Bizkai, Gipuzkoa eta Arabako finantza autonomia "babestuta" geratu dela jakinarazi du Bizkaiko Foru Aldundiak ohar baten bidez. EAEko Auzitegi Nagusiak gaur goizean jakinarazi duen erabakiarekin, azken urteetan euskal zerga sistemari jarri zaizkion errekurtso guztien ebazpenak eman dira. Kontzertu ekonomikoak eta sozietateen gaineko zergak denera zortzi helegite jaso ditu, Errioxa eta Gaztela eta Leongo gobernuek eta Errioxako UGT sindikatuak jarrita.
EAEko Auzitegi Nagusiak eta Espainiako Auzitegi Gorenak emandako ebazpen horien ondorioz, euskal foru lurraldeek Europako Batasuneko Justizia Auzitegiak ezarritako hiru irizpideak betetzen dituela azpimarratu du Bizkaiko Foru Aldundiak: autonomia instituzionala, jarduerazkoa eta ekonomikoa. Era horretan, hiru lurralde historikoei zerga sistema propioa edukitzeko aukera ematen die, baita sozietateen gaineko zergaren erregulazio propioa ere.
