Europako Batzordeko Lehia komisario Joaquin Almuniak ontziolen laguntzen inguruan aurkeztutako behin-behineko txostena aldatzeko aukera ikusten du Eusko Jaurlaritzak, eta Iñigo Urkullu EAEko lehendakaria helburu horrekin joango da datorren uztailaren 11n egingo duten bilerara. Bilera horretan izango dira, halaber, Jose Manuel Soria Espainiako Gobernuko Industria ministroa eta Galiziako eta Asturiasko presidenteak.
Arantza Tapia Eusko Jaurlaritzako Garapen Ekonomikoko sailburuak auziari irtenbidea emateko "zirrikitu" bat ikusten dutela adierazi du Europa Pressek egindako elkarrizketa batean, eta "argudio juridikoak eta berriak" daudela Europako Batzordeak ontziolei emandako laguntzak itzultzeari buruzko erabakia alda dezan. Ildo horretan, Almuniak bezperan egindako adierazpenei eutsi die Tapiak. EBko komisarioak esan zuen "argumentu berriak badaude" bere txostena aldatzeko aukera dagoela, eta Tapiak "denbora" badagoela gaineratu du. "Uste dut zirrikitu bat ireki dela, eta azken muturreraino baliatuko dugu aukera hori". Uztailaren 17an kaleratuko du Europako Batzordeak behin betiko ebazpena.
Alberto Nuñez Feijoo Galiziako presidenteak ere Almuniak esandakoei eutsi nahi izan die, eta azaldu du Industria Ministerioak dagoeneko helarazi dizkiola Lehia komisarioari hark aipatutako "argudio juridiko, sozial eta ekonomikoak". Ontziolen sektorea ez "zigortzeko" eskatu du, halaber, neurri hori ez delako "ez justua, ez eta ekonomikoki bideragarria ere".
