Luze doa itxaronaldia FagorBrandteko langileentzat. Erlojua kontra dute, zenbat eta gehiago atzeratu epailearen erabakia, enpresaren egoera ekonomikoa are gehiago ari baita okertzen. Gaur egun, geldirik daude lau lantegiak. Alabaina, seinale ona izan daiteke Nanterreko Merkataritza arloko epaitegiak (Frantzia) laugarrenez atzeratzea FagorBrandti buruzko erabakia. Izan ere, marken gaineko akordiorik ezean, enpresa likidatzea da beste aukera.
Asko konplikatu ditu gauzak Pedro Malagonek, Fagor Etxetresnen likidazioa kudeatzen ari den epaileak, martxo erdian emandako ebazpenak. Esan zuen Cevital taldeak Frantziako markengatik egindako 25 milioi euroko eskaintza txikiegia zela, eta 35 milioi eskatu zituen. Talde aljeriarrak helegitea jarri zuen ebazpen horren kontra. Haren arabera, 25 milioiko eskaintza ere gehiegizkoa da hainbat adituren arabera, eta ez dago prest gehiago ordaintzeko. Hamabost eguneko epean espero du Malagonen erantzuna.
FagorBrandt ere likidaziora joaten bada, gauzak are gehiago konplikatuko direla diote langileek. Cevitalek egindako eskaintzak 1.800 lanpostutatik 1.200 bermatzen ditu Frantzian. Beldur dira, likidazio fasean eskaintza hori beste inork parekatuko ez ote duen. Frantziako komunikabideen arabera, apirilaren 4ra atzeratuko du Nanterreko epaitegiak ebazpena. Langileak zuzendaritzarekin bilduko dira gaur, azken berrien berri izateko.
