Edesari hiru milioi euroko bermea ematea proposatu zuen herenegun Bizkaiko ahaldun nagusi Jose Luis Bilbaok, eta aukera hori aztertzen aritu da goizetik Fagor Etxetresnetako Kontseilu Errektorea. Proposamena onartuz gero, hartzekodunen konkurtso aurreko egoeratik atera zitekeen Basauriko filiala.
Sergio Treviño Bilbaorekin batzartu da aurrena, eta Edesako langileekin egin du bilera gero. 15:00etan hasi du beharginekin bilera, eta, Europa Press agentziak jakinarazi duenez, langileei jakinarazi die Basauriko planta ez dela bideragarria bere kabuz, eta hura ere hartzekodunen konkurtsoan sartuko dela, Fagor Etxetresnetako egitura osoarekin batera. Edesako beharginek Basauriko plantan jarraitzen dute itxialdian.
Halaber, kooperatibak baieztatu du ez duela gaur aurkeztuko hartzekodunen konkurtsoa, baina zehaztu du "epe laburrean" egingo duela.
Kontseilu Sozialaren oharra
Kontseilu Errektorea bilera egiten ari dela, ohar bat plazaratu du Fagor Etxetresnetako Kontseilu Sozialak. Adierazi du "bizirik" mantenduko duela "bai kooperatiba eta bai gainerako bazkideekin duen konpromisoa", eta lanean jarraituko duela "maila guztietan eta eskura dituen baliabide guztiekin".
Egungo egoeran Kontseilu Sozialak eta bazkideek duten erantzukizuna "bere gain" hartu du kontseilu horrek, baina, horrekin batera, ohartarazi du ez duela onartuko "ezerezean gera daitezela beste ardura batzuk ezta bazkideek zentzu horretan jaso dezaketen tratu desegokirik".
Kontseilu Sozialak eskerrak eman dizkie Mondragon Korporazioko gainontzeko kooperatibetako bazkideengandik "orain arte jasotako eta etorkizuneko laguntza eta solidaritatea" dela eta; "Denok hausnartu beharko genuke gertatutakoaren inguruan, eta lanean jarraitu mugimendu kooperatibista indartze aldera", erantsi du.
Azkenik, herritarrei eta erakunde publikoei dei egin diete "industria sektore eta enpleguarekin eta finantza sistemarekin erakutsitako adinako konpromisoa adieraz dezaten".
Confebask, "berdintasun" eske
Fagor Etxetresnen egoeraren harira, "atsekabea" adierazi du Confebaskek, baina erakundeei eskatu die "ardura, iraunkortasun eta berdintasun irizpideekin" jokatzeko. Neurriak hartzerakoan, egoera orokorra eta "industria osagarria eta subkontratazioaren osotasuna" aintzat hartzea galdegin die patronalak erakundeei.
Patronalari "funtsezkoa" iruditzen zaio erakundeek finantzaketa eta enplegua mesedetze aldera hartutako neurriek "bideragarritasun, legezkotasun" eta "krisi urteotan desagertu diren 8.000 enpresa proiektuekiko ez-bazterkeria irizpideak" jarraitzea.
