Azaroaren 21ean aurkeztu zuten Fagor Etxetresnek Edesa konkurtso legean sartzeko eskaria, Bizkaiko Foru Aldundiak eskainitako hiru milioi euroko bermea baztertu ondoren. Mastercook eta Irlandako filiala ere hartzekodunen konkurtsoan daude, eta soilik Grumal eta Proiek filialen eskaera ebaztea falta da.
Ebazpenean, Jose Malagon epaileak nabarmendu du Fagor Etxetresnak Edesaren kapitalaren %82,29ren jabe dela, eta, egoitza Basurin (Bizkaia) badu ere, Fagorren menpe dagoela —eta haren egoitza Arrasaten dagoela—. Halaber, gogorarazi du Edesak soilik Fagor hornitzen duela, eta Basauriko plantaren zorraren %77 Fagorrekin duela. Horregatik guztiagatik, epaileak ebatzi du Donostiako auzitegiak duela eskumena Edesaren konkurtsoa aztertzeko.
Epailearen arabera, Edesaren aktibo nagusia Fagorren maileguak dira, eta, beraz, uste du "begi bistakoa" dela Fagorren konkurtsoak "halabeharrez" daramala Edesa kaudimen gabeziara, bere "diru sarrera iturrira" jotzeko aukerarik gabe geratuta.
