Fed-ek urte bukaerara arte luzatuko du epe luzerako zorra erosteko 'Twist' operazioa

Luze jo du AEBetako Erreserba Federalaren (Fed) bilerak:bi egun. Euroguneko krisia eta AEBetako ekonomiaren ahulezia izan ditu aztergai, horrek merkatuetan sortzen dituen zalantzak eta tentsioak. Eta erabaki bat hartu du: Twist operazioa urte bukaerara arte luzatzea. Epe laburrerako eta epe ertainerako zor bonuak saldu eta haien ordez epe luzerakoak erostea da operazioaren funtsa. 267.000 milioi dolar bideratuko ditu horretara, hiru urte edo gutxiagoan itzuli beharreko tituluak saldu eta sei eta 30 urte bitartean itzuli beharrekoak erostera. Zertarako? Interes tasen gaineko presioa arintzeko, baxu mantendu nahi baititu, %0 eta %0,25 artean, gutxienez 2014ra arte. Horrek ekonomiari hazten lagunduko diola uste du Ben Bernanke Fedeko presidenteak, dena beharko baitu, aurreikuspenak beherantz berrikusi ostean. Aurten, %2,15 haziko dira AEBak, eta %2,5 datorren urtean.