EH Bilduk proposamen "argiak eta zehatzak" egingo ditu bihar Eusko Legebiltzarrean. Abertzaleek Gipuzkoan onartutako fortuna handien zerga eramango dute zerga sistemari buruzko osoko bilkurara. EAJk eta PSE-EEk egindako akordioa dela eta, bi alderdi horiek "literaturatik ekintzetara" igarotzea nahi dute, Oskar Matute eta Dani Maeztuk azaldu dutenez.
"Kapitalaren errentak gehiago zergapetzea" proposatuko du EH Bilduk, beraz, EAJk eta PSE-EEK zerga sistemaren inguruan duten "anbiguotasuna" bazter dezaten. Jeltzaleek eta sozialistek proposamen "hutsalak eta zehaztasunik gabeak" egingo dituztela uste du EH Bilduk, "orokortasunean mugituz eta proposamen zehatzetan lurreratu gabe". "Bi urtetan egin ez dutena azaltzeko zailtasun handiak" dituzte EAJk eta PSE-EEk, Matuteren arabera, eta halaxe ulertu behar da bi alderdi horien "orain arteko zehaztasun gabezia".
Jarrera hori Gipuzkoako Diputazioak hartutako neurriekin alderatu dute EH Bilduko kideek. "Gizartea kohesionatzeko lanean" aurrerapausoak eman direla azaldu dute. Biharko osoko bilkuran bi gizarte eredu islatuko direla uste dute: EH Bildurenak apustu egiten du "erabateko burujabetasunaren lanabesaren bidez eredu ekonomiko eta sozial desberdin bat eraikitzeko, pertsonak lehen lerroan jarrita". Beste ereduaren babesleak EAJ, PSE-EE eta PP izango lirateke; "orain arte egindakoa zalantzan jartzen ez duen eredua" litzateke.
