349 milioi euroko aurrekontua izango du Gasteizko Udalak 2014rako. Gaur ezagutarazi dute akordioa PPk eta EAJk, asteak negoziazioetan igaro eta gero.
Gorka Urtaran EAJko Gasteizko bozeramaileak azaldu du PPk onartu egin dituela EAJren eskari gehienak. Gutxiengoan gobernatzen du PPk Arabako hiriburuan, eta aurrekontuak aurrera ateratzea ahalbidetu dio EAJrekin lortutako akordioak.
Arabako Foru Aldundiak 2014rako eginiko aurrekontuak ere onartu zituen EAJk abenduan. PPk aintzat hartu zituen jeltzaleek ekonomia sustatzeko, lana sortzeko, udalak finantzatzeko, Arasur plataforma logistikoa laguntzeko eta euskararen aldeko politikak sustatzeko eskatutako diru sailak —%25eko murrizketak aurreikusten zituen diputazioaren egitasmoak alor horretan—.
