Zerga iruzurra atzemateko jarduerei esker, Gipuzkoako Ogasunak 294,3 milioi euro azalerazi ditu 2009an: 137,5 milioi balio erantsiaren gaineko zergari (BEZ) dagozkio; 69,3 pertsona fisikoen errentaren gaineko zergari (PFEZ); 39,6 milioi sozietate zergari eta 20,9 milioi beste zergei.
Gipuzkoako Ogasunak 3.427 milioi euro bildu zituen iaz zerga bidez. Hortaz, atzemandako iruzurra bilketa osoaren %6,8 izan da. Iruzurraren %70 berehala jaso ahal izan du Ogasunak.
Ikerketen artean, 38,2 milioi euroko balioa duten 24 jarduera zerga delitu direla nabarmendu du diputatuak. Dagoeneko, epaileen esku jarri dituzte bide penaletik. Iaz, edonola ere, aurreko urtean baino kopuru txikiagoa atzeman dute. 2008an 335,7 milioi euro azalerazi zituzten, baina orduan, sozietate zergaren gaineko hiru kasu «erraldoi» aurkitu zituzten.
Iruzurraren aurkako neurriak
Ogasunak zerga iruzurraren kontra hainbat neurri sustatu ditu: notarioen elkargoarekin informazioa trukatzeko ituna, ikerketarako langile gehiago jarri eta herritarren salaketak jasotzeko zerbitzua. Salaketak egiteko lau bide eskaintzen dituzte iaztik: webgunea, posta elektronikoa, telefonoa eta Ogasunaren egoitza bera. Gehien erabilitakoak, orain arte, Internet eta telefonoa izan dira.
Aurtengo kanpainari begira, iruzurraren aurkako egitasmoak iragarri ditu Gonzalezek. Garrantzitsuena izango da 3.000 eurotik gorako finantza eragiketa guztiak ikuskatzeko dekretuak onartzea. Ezarpen, funtsa zein bestelako ordainketak, kobratzeak eta bestelako eragiketak banan-banan aztertuko dituzte.
