Gizonek baino %30 gutxiago irabazten dute emakumeek

Emakume eta gizonen arteko desberdintasunak agerian utzi ditu INE Espainiako Estatistika Erakundeak kaleratu berri duen datu sortak. Haren arabera, Hego Euskal Herrian, emakumeen batez besteko soldatak gizonenak baino %30 txikiagoak dira.

Araba, Bizkai eta Gipuzkoako langileek, batez beste, 23.893 euroko soldata gordina poltsikoratzen dute urtearen amaieran. Gizonak badira, batez bestekoa baino zerbait gehiago jasoko dute, 26.911 euro; eta emakumeak badira, zerbait gutxiago, 19.772 euro hain zuzen.

Nafarroako langileek, berriz, oro har EAEkoek baino soldata txikiagoak dituzte, INEren arabera. Han, urteko batez besteko soldata gordina 22.219 eurokoa da; 25.273 eurokoa gizonena eta 18.129 eurokoa emakumeena.

Zifra horiek, ordea, soldata gordinei dagozkie. Hau da, hilabetearen amaieran langile batek kobratuko duena kalkulatzeko, hamalau ordainsari-hamabi hilabeteetako soldatak gehi aparteko bi ordainsari- eta zergak ere kontuan hartu beharko direla. Horiek horrela, Hego Euskal Herriko langileek, batez beste, 1.400 euro inguruko soldatakobratzen dute hilabetearen amaieran.