Greziako Gobernuak eta alderdiek azkenean lortu dute murrizketa gehiagori buruzko akordioa. Europako Batzordeak, Europako Banku Zentralak eta Nazioarteko Diru Funtsak egindako eskaeraren inguruan ordu askoan eztabaidatu ostean erdietsi dute akordioa. Ondorioz, nazioarteko finantza laguntza gehiago jasotzeko baldintzak bete ditu Greziak.
"Ez genuen beste ihesbiderik", esan du arratsaldean Pantelis Kapsis gobernuko bozeramaileak. Orain Greziako Legebiltzarrak balekoa eman beharko dio; igandean edo astelehenean izango da batzarra.
Bigarren erreskatearen truke (130.000 milioi euro), murrizketen artean daude gastu publikoa barne produktu gordinaren (BPG) %1,5 gutxitzea (3.300 euro inguru), gutxieneko soldata 751 eurotik 600 eurora gutxitzea, mila eurotik gorako pentsioei %20 kentzea eta funtzionarioak kaleratzea (15.000 aurten).
Euroguneko Finantza ministroak Bruselan bilduta daude, Greziaren bigarren erreskatea aztertzeko. Evangelos Venizelos Finantza ministroa itxaropentsu agertu da, eta Eurotaldeak erreskate planaren inguruan "erabaki positibo bat" hartzea espero du. Kapsisek esan du gaur bertan lortu nahi dutela akordioa Europarekin.
