Greziako Parlamentuak 3.200 milioi euro aurrezteko neurriak onartu ditu. Murrizketa horiek osasun zerbitzuetan, pentsioetan (75 milioi euro), funtzionario kopuruan eta bestelako gastuetan izango dute eragina.
EBZ Europako Banku Zentralak, NDF Nazioarteko Diru Funtsak eta EB Europako Batasunak —troika izenekoak—eskatutako neurria da hori, bigarren erreskaterako baldintza gisa.
300 diputatuetatik 202k onartu dute testua, eta 80k bozkatu dute aurka.
Aurretik parlamentuak onartu zuen hartzekodun pribatuen zor bonuen trukea burutzeko beharrezkoa den legedia.
Horrela, hartzekodun pribatuek 107.000 milioi euro barkatuko dizkiote, bankuen eskuetan dagoen Greziaren zor publikoaren %53,5, eta zor bonu berriak emango dizkiete zaharren truke.
