Grezian gero eta indar handiagoa du Syriza ezkerreko koalizioak. Azken hauteskundeetan bigarren indarra izan zen, eta azken inkestek diote gaur egun lehen indarra litzatekeela. "Niri ez zait komeni bozak aurreratzea [2016an lirateke], itxarotea baizik. Baina Greziako herriari ez zaio komeni itxarotea, ezin du", esan du Alexis Tsipras Syrizako buruzagiak. Izan ere, herrialdea krisi sozial eta ekonomiko sakonean da. Hark badu eredu bat: Argentina.
Hain zuzen, 2001ean krisitik ateratzeko Argentinak hartutako bidea laudatu du Tsiprasek: ekonomia solidarioa, banku publikoak, kooperatibak... Dena dela, aitortu du Greziak ezingo lukeela bide beretik jo, "Argentinakoa munduko ekonomiarik boteretsuenetakoa baita. Greziak ez du haren ekoizpen gaitasunik".
"Garrantzitsuena joerak" aztertzea dela adierazi du. Hala, uste du Greziak ikasi egin dezakeela Argentinan, Bolivian eta han inguruko beste herrialde batzuetan dauden esperientzietatik, "liberalismoaren osteko aro bat bizitzen ari baitira".
"Bide alternatiboak" badaudela erakustea da Syrizaren erronka, Tsiprasen arabera. "Ezkerra beti jo izan da dogmatiko bezala, baina orain dena aldatzen ari den garai hauetan, galdera da: zein da dogmatikoa?".
"Murrizketekin hazkuntzarako aukera oro eragozten" ari direla salatu du, eta "Greziako herria shock egoeran" dela horregatik.
