2015. urterako lan egutegia onartu du Eusko Jaurlaritzak gobernu kontseiluan. Hamabi egun horiei udal bakoitzak aukeratzen dituen bi egun gehitu behar zaizkie. Honako hauek izango dira jaiegunak: urtarrilaren 1a eta 6a, martxoaren 19a, apirilaren 2a, 3a eta 6a, maiatzaren 1a, uztailaren 25a, abuztuaren 15a, urriaren 12a eta abenduaren 8a eta 25a.
Eusko Legebiltzarrak bertan behera utzi zuen Patxi Lopez buru zuen Jaurlaritzak urriaren 25erako ezarritako jaieguna. Josu Erkoreka Eusko Jaurlaritzako bozeramaileak azaldu duenez, gobernuak ez du asmorik egun hori ordezkatuko duen ekimenik abiatzeko. Haren esanetan, Eusko Legebiltzarrak aukeratu beharko luke "adostasun ahalik eta zabalenarekin" ordezko jaiegun bat, baina argitu du Jaurlaritzak ez duela "jarrera bereziki aktiboa" izango.
