Ondorioak izango ditu Euskal Herrian ere Banco Popularrek aurkeztu duen enpleguaren erregulaziorako eskaerak. LAB sindikatuak emandako datuen arabera, hamazortzi bulego itxiko dituztela iragarri du finantza erakundeko zuzendaritzak. Guztira, 173 lanpostu galduko direla ohartarazi du sindikatuak.
Plan horrek ondorio handiak izango lituzke Bilbo hiriburuan eta Iruñerriko eskualdean. Eremu horietan, bankuak lekua galduko luke lehiakideen aldean, LABen ustez. Guztira, 2.900 langile kentzeko asmoa du Popularrek, lantaldearen %22,8. Diruz lagundutako kaleratzeen eta mugikortasun geografikoaren bidez mila lanpostu egokitu nahi ditu enpresak. Beste 1.900 lanposturentzat erretiro aurreratuaren antzeko formula proposatu du.
LABek borondatezko lanuzteak egitea nahiago du, eta aldi baterako erregulazioen bidez egoerari aurre egitea, behin betiko kaleratzeak egin ordez. Diruz lagunduta lanpostua uzteko aukera eskaintzea ere onartuko luke.
Erregulazioaren aurka protestara deitu du sindikatuak biharko. Arratsaldean bilkura egingo du LABek, Popularrek Bilbon duen egoitza nagusiaren aurrean.
