Hilaren 28an bateratzea onartzeko Biltzar Orokorra egingo du BBK-k

BBK-k Espainiako Baloreen Merkatuen Komisionatuari jakinarazi dionez, hilaren 28an egingo dute Kutxarekin bateratzea erabakiko duen Biltzar Orokorra. Bizkaiko aurrezki kutxak bat egitearen alde egingo duela ziurtzat jotzen da, EAJk, EAk eta CCOO-k bateratzearen alde bozkatuko dutela iragarri ondoren. Fusioa onartzeko behar diren bi herenak baino gehiago dituzte hiruen artean.

Kutxan, aldiz, oraindik ez dago bermatua bat egiteko behar den gehiengoa, boto bakarrarengatik. Erakunde horretako presidente Xabier Iturbek, ordea, ez du uste fusioa ez dutela onartuko eta bozkatzeko eskubidea dutenei "sen ona eta erantzunkizuna" edukitzeko eskatu die.

Bi kutxa hauek bat egitea onartzen badute, Euskadiko Aurrezki Kutxa sortuko dute. Vital Kutxari atea irekiko diote, Arabako erakundearen gobernu-organoek "egokia den unean" bertan sartzea erabakitzen dutenean.