Hiru-ren alde agertu dira gaur ELA, LAB, CCOO, STEE-EILAS, ESK eta EHNE sindikatuak

Hiru garraio sindikatuaren alde agertu dira gaur goizean ELA, LAB, CCOO, STEE-EILAS, ESK eta EHNE sindikatuetako ordezkariak, Gasteizen.

Hiruren kontra hasitako zigor espedientea artxiba dezala eskatu diote sindikatuek Eusko Jaurlaritzari. Honen menpeko Lehiakortasunaren Defentsarako Auzitegiak Hiru sindikatua zigortu nahi du, iaz garraiolariei, erregaien prezioaren gorakadaren aurrean, "modu duinean lan egiteko" tarifak igotzeko "gomendatu" zielako. Sindikatuari 500.000 eta 10.000.000 euro arteko zigorra ezartzen ahal dio auzitegiak, hots, gehienezko zigorra, "lehiakortasun arauak urratu" izana leporatuta.

ELAko idazkari nagusi Adolfo Muñoz, LABekoa, Ainhoa Etxaide eta CCOOkoa, Unai Sordo, Hiruko idazkari nagusi Patxi Agirrerekin batera azaldu dira gaur goizean Gasteizen, zigor espediente horrek "sindikatuaren bukaera" eragin dezakeela ohartarazteko, eta eskaera neurriz kanpokoa dela salatzeko.

"Aurrekari arriskutsuak" eta "desagertzeko arriskua"

Sindikatu horiez gain, EILAS, ESK eta EHNEk ere izenpetu dute komunikatua. Horretan, Eusko Jaurlaritzari espedientea "berehala" artxibatzeko eskatzen diote, "aurrekari arriskutsua delako askatasun sindikala murrizteko".

"Hiruk egindako delitu bakarra hau izan da: garraiolari autonomoentzako lan baldintza duinak publikoki eskatzea eta haiei ohartaraztea inola ere ez dutela beren segurtasuna eta euskal errepideetako beste erabiltzaileenak arriskuan jarriz lan egin behar", nabarmentzen dute komunikatuan.

Hala, Hiruri sostengua adierazi dioten beste sindikatuen iritziz, hura "erruduna" da, "baina garraiolariei ezinezko bidaiak ezinezko baldintzetan egin ahal izateko errepideetan hil ez daitezela gomendatu izateagatik".

Espedientearekin, sindikatuen ustez, Eusko Jaurlaritzak Hiru sindikatuari eta honen izaerari eraso egin nahi die. "Hiruk lan baldintza duinak izango dituen garraio ereduaren alde egiten du".

Astelehenean, protesta Gasteizen

Hiruko idazkari nagusiak ohartarazi du, Lehiakortasunaren Defentsarako Zerbitzuak proposatutako zigorra ezartzen baldin bada, sindikatua desagertzeko "arriskua" egongo dela. Gaur egun, 1.200 garraiolari autonomo dira Hiruko kide.

Jasotako babesa eskertzeaz gain, euskal garraiolari autonomoei dei egin die Agirrek, datorren astelehenean, hilaren 9an, Gasteizen egingo duten protesta elkarretaratzera bil daitezen, Ajuria Enearen aurrera.