Azken urteotan bost milioi langabe baino gehiago egotetik hiru milioira jaistea lortu da Alemanian. Beheranzko joera hori nagusitu zen iaz ere. 2007koa abenduan, esaterako, 2008koan baino 304.000 lagun gehiago ari ziren lan bila, eta langabezia tasa %8,2koa zen.
Orain, bilakaera hori amaitu den beldur dira herrialdean. «2008a urte ezin hobea izan da. Baina, abenduko zenbakiek erakusten dute krisia hasi zaiola lan merkatuari eragiten», adierazi du Frank Weise Alemaniako enplegu bulegoko zuzendariak. Haren esanetan, 2009ko aurreikuspenak okertu ditu langabezia datuak.
Gobernuak datorren astean aurkeztuko du krisiari aurre egiteko prestatu duen 50.000 milioi euroko plana. Olaf Scholz Ekonomia ministroak adierazi duenez, planaren bidez enpresei laguntzen ahaleginduko dira, krisiak enpleguan ahalik eta gutxien eragin diezaion.
AEBetan ere langabezia gora
Alemanian ez ezik, AEBetan ere langabeziak gora egingo duela aurreikusten da. Bihar emango ditu datu ofizialak Gobernuak, baina atzo Automatic Data Proccesing (ADP) erakundeak egindako ikerketaren emaitzak jakinarazi zituzten. Haren arabera, abenduan azaroan baino 693.000 lagun gutxiago aritzen ziren sektore pribatuan. Zerbitzu enpresetan murriztu dira lanpostu gehien, 473.000; ekoizpen-ondasunen industrian 220.000 lagun gutxiagok egiten zuten lan; eta manufaktura enpresetan 120.000 gutxiagok.
ADPk bildutako emaitzen arabera, enpresa ertain eta txikietan murriztu da enplegu gehien. 500 pertsona baino gehiagoko enpresetan 91.000 lagun gutxiagok egiten zuten lan; 50 eta 499 langilearteko enpresetan 321.000 gutxiagok; eta 50 langile baino gutxiagokoetan 281.000 langile gutxiagok. «Datu horiek argi uzten dute ekonomiaren atzeraldia eraikuntza eta manufaktura enpresetara baino gehiagotara zabaldu dela», adierazi du ADPk.
