Urtea ez doakio gaizki Iberdrola energiaren erraldoiari. Urteko aurreneko seihilekoan %7,4 igo ditu irabaziak, 1.506 milioi arte, CNMV merkatu arautzaileari jakinarazi dionez. Fakturazioak gora egin du nabarmen (%6,2) urteko lehen zatian, 16.125,6 milioi eurora arte. "Egoera makroekonomikoaren hobekuntzak" bultzatu ditu gora emaitzak Iberdrolak dioenez.
Argindarraren eta gasaren kontsumoak hazi egin dira azken hilabeteetan, "hobekuntza" horrek hauspotuta, Bilboko konpainiak dioenez, eta dolarraren eboluzioak ere lagundu duela gaineratu du. Nazioarteko negozioari esker, 3.795 milioiko Ebitda izan du sei hilabeteotan, iaz baino %5,7 gehiago.
