Inflazioa %2ra jaitsi da, urte hasieran ez direlako argindarra eta tabakoa garestitu

Beheranzko bideari eusten dio inflazioak Hego Euskal Herrian. Abenduan urte arteko tasa %2,4 zen, eta %2 urtarrilean. Iaz ez bezala, urte hasieran ez dira igo argindarraren eta tabakoaren prezioak, eta telefonia ere merkatzen hasteak ere apaldu du kontsumo prezioen indizea. Ohi denez, abenduarekin alderatuz gero prezioak %1,3 jaitsi dira, Gabonen osteko merkealdiari esker. Aurten jantzien eta oinetakoen merkatzea nabarmagoa izan da, krisiaren eta udazken epelaren ondorioz salmentak bultzatu beharra zutelako dendariek. Espainiako Gobernuak ontzat jo du inflazioaren datua eurogunearekiko lehiakortasuna irabaztea dakarrelako, eta baztertu egin du deflazioan erortzea, hots, prezioek modu jaraian behera egitea. Unai Sordo CCOOko buruak enpresaburuen irabaziei egotzi die inflazioa.