Elsa Fornero Italiako Gobernuko Lan ministroak iragarri du parlamentuak lan erreforma ez badu onartzen exekutiboak dimisioa emango duela. "Orain arte erreforma proposamenari buruzko kritikak jaso ditugu, alde batetik eta bestetik jaso ere. Gauza bat garbi dugu: legebiltzarrera joango gara proposamen honekin eta, ez bada onartzen, etxera joango gara".
"Herriarentzat" egindako erreforma dela esan du Lan ministroak, "orekatua, eta ez sindikatuak, enpresak edo autonomoak gustura uzteko egina. Lan merkatu ireki, integratzaile eta dinamikoan pentsatuta egina dago".
Gobernuak, oraingoz, ez du legebiltzarreko talde nagusien erabateko babesik erreforma onartzeko. Silvio Berlusconi lehen ministro ohiaren PDL Askatasunaren Herria alderdiak kontratazioan malgutasun handiagoa behar dela esan du. PD Alderdi Demokratak, berriz, arrazoi ekonomikorik gabe kaleratutako langileak berriro kontratatzeko bideak jartzeko galdegin du —gobernuak hori epaileen esku utziko du—.
Asteartean legebiltzarreko talde nagusiekin bilduko da gobernua, Erroman.
Italian langabeziak otsailean jo zuen goia: %9,3.
