Luis de Guindos Espainiako Ekonomia ministroak "mirari bat" egin zuen uda honetan Europako Batzordeak Espainia zigor ez zezan defizit helburua bete ez dela eta. 2.000 milioi euro arteko isunari aurre egiteko aukera bene-benetakoa zen, baina Madrilek saihestu egin zuen azkean defizit helburua ez betetzeagatik zigortutako lehen estatu bazkidea bihurtzea. Egiturazko funtsak izoztea ere isunarekin batera zetorren aldagai zen: lehena ekidin zuen Espainiak, baina bigarrena gauzatuko dela gero eta argiago geratzen ari da.
Eta hor Hego Euskal Herriak badu jokoan finantzaketa iturri baten galera. 1.500 milioi euroko diru iturria gal dezake Espainiak funtsak izoztearekin bat, horietako zati esanguratsu bat Arabak, Bizkaiak, Gipuzkoak eta Nafarroak galduko lukete. "Lurralde horiek ez dute merezi iragarritako funtsen izoztea Espainiak defizit helburuak ez dituelako bete", azaldu dio Izaskun Bilbao EAJko europarlamentariak Europako Batzordeari.
"Guri ez aplikatu"
EAEren eta Nafarroaren sistema fiskalen izaera autonomoa azaldu du Bilbaok, eta horretan oinarrituta Hegoaldeak isunik ez pairatzea eskatu du. "Luxenburgoko auzitegiaren arabera, Euskadik eta Nafarroak ogasun autonomoak dituzte. Defizita eta zorra zaindu dugu; zorrotzak izan gara eta eta egonkortasun ituna bete dugu. Ez dugu isunik merezi. Horregatik eskatzen dugu isunik baletor, guri ez aplikatzeko".
Alegia, Espainiak Europarekin hitzartutako defizit helburuarekin utzikeria izan duelako Hego Euskal Herriak ordain dezakeela luze gabe, eta EAJ sute horren kontrako harresia ipini nahian dabil. "Gure ekonomia produktiboa eta garapen ekonomikoa eta soziala laguntzeko Europako ekarpena dago jokoan", esan du Bilbaok.
