Finantzen Euskal Kontseiluaren gaurko bilerak 2016ko zerga bilketaren itxiera aurreikuspena eman du, gaur Gasteizen egindako bileran. Guztira, 13.025 milioi euro izango dira. Ez da iritsi orain dela urtebete zehaztu eta administrazioek aurtengo aurrekontuak egiteko erabili zuten kopurura. Hain zuzen ere, 473 milioi gutxiago izan dira. Urte osoaren joanean bilketa iragarritakoaren azpitik egon da.
Itxiera horrekin Jaurlaritzak 324 milioi gutxiago jasoko ditu azkenean foru aldundietatik. Hori bai, defizit mugak izan duen hiru hamarreko igoerari esker, soilik 53 milioi euro gutxiago izango ditu eskura gastatzeko. "Oso eramangarria", Ricardo Gatzagaetxebarria Jaurlaritzako Ogasun eta Finantza sailburuaren ustez. 2016ko zerga bilketan Pertsona Fisikoen Errentaren gaineko Zergaren emaitzak onak izan diren bitartean, Sozietateen gaineko Zerga izan da uste baino okerrago ibili dena, batez ere Bizkaian.
Hurrengo urteari begira, aurreikuspen zuhurrak egin ditu Finantzen Kontseiluak, eta 2016rako aurreikusitako kopuru berbera jarri du helburu 2017an biltzeko, 13.498 milioi euro. Datu hori kontuan hartuta, Gatzagaetxebarriak aurreratu du gobernuaren aurrekontu osoa %0,5 inguru handituko dela. Hartutako zorra bueltatzeko eta amortitzatzeko gutxiago gastatu beharko duenez, 150 milioi euro gehiago izango ditu sailetako politikak finantzatu ahal izateko. Foru Aldundiek aurtengoen antzeko aurrekontuak egin ahal izatea espero dute, eta, horren haritik, ez dute murrizketarik aurreikusten zerbitzu publikoetan.
