Iñigo Urkulluk aurrekontuak erretiratu izana garaipen propiotzat hartu dute maiatzaren 30eko greba orokorrera deitu duten sindikatu eta eragile sozialek. “Gizarte mobilizazioaren arrakastaren ondorioa da erabaki hau”, esan du Lorea Ureta eragile sozialetako ordezkariak.
Baina aurrekontuak bertan behera utzi eta gero, sindikatu eta eragile sozialek salatu dute Jaurlaritzak ez duela “inolako gogorik” ezartzen duen politika aldatzeko. “Parlamentuan onartu nahi zituen murrizketak aplikatzen jarraitzen du, eta ez du ezer aldatuko”. Hau da, gehiengorik eduki ez arren murrizketak ezartzen jarraituko duela salatu du Uretak. Horregatik, jarrera hori “antidemokratikoa” dela leporatu dio Iñigo Urkullu lehendakariari, Yolanda Barcina Nafarroako presidenteak egiten duen “berdina” egiten duela gogoraraziz.
Hori dela eta, gaur goizean Eusko Jaurlaritzak Bilbon duen egoitzan “errotiko aldaketak” eskatu dituzte Hego Euskal Herriko aurrekontu eta zerga politiketan. “Jendearen beharrizanak kapitalaren aurretik jartzeko eskatzen dugu, 180 graduko aldaketa bat”, esan du Uretak.
