Jaurlaritzak superabita izan du urteko lehen erdian; Nafarroak, %0,89ko defizita

Neurritasuna eta gastu publikoaren kontrola obsesio bihurtu diren garaiak izanik, urteko lehen erdian defizitari ihes egin dio Eusko Jaurlaritzak. Hain zuzen ere, 82 milioi euroko superabita izan du, Espainiako Ekonomia Ministerioak atzo jakinarazitako datuen arabera. Urte amaieran 892 milioi euroko defizita izateko konpromisoa bere egin zuen Patxi Lopezen gobernuak Ekonomia Ministerioarekin, BPGaren %1,3. Urte erdian superabita izateak ez du zertan esan nahi urte osoan hala izango denik, diru sarrerak eta ordainketak antolatzeko EAEn duten egitura bereziaren ondorioz. Nafarroak ere defizita %1,3 baino gutxiago izatea onartu zuen, eta oraingoz kopuru horren azpitik jarraitzen du. Ekainera arte %0,89 izan zen defizita Yolanda Barcinaren gobernuaren kontuetan; 169,75 milioi euro, hain zuzen ere.