Askotan salatu dute Corrugadoseko langileek Gallardo taldea eurekin jolasean ari dela. Gaurkoa beste adibide bat dela diote. 76 langile gaur bertan kaleratu nahi zituen, eta lantegira joateko agindu zien, agiriak sinatzera. Joan dira, baina enpresaren bitartekari lanak egiten dituenak esan die enpresak ez duela dirurik kalte-ordainak pagatzeko. Legearen arabera, ordaina pagatu behar da kaleratzea gauzatzeko. Hala, 76 lagun horiek oraindik enpresan jarraituko dute. Gallardoren jarrerarekin oso haserre agertu dira langileak, eta “seriotasuna” eskatu die.
Azpeitiko lantegia itxi eta 278 langile kaleratzeko asmoa du Gallardok, eta Lasaoko Corrugadosen ere 68 lagunetik 38 bota nahi ditu. Erregulazio espedientea negoziatzeko epea akordiorik gabe amaitu zen. Enpresak aukera eman zien langileei euren kabuz alde egiteko. Lan egindako egun bakoitzeko 30 eguneko ordaina proposatu zien, hemezortzi hilabeteko gehienezko mugarekin. Ostiralean bukatu zen izena emateko epea, eta zortzi lagunek soilik eman zuten. “Zirriborro bat soilik aurkeztu du enpresak; ez du jartzen kaleratu ostean langabezia kobratzeko aukerarik izango den ere”, azaldu dute.
Erankunde publikoen babes falta ere salatu dute. “Ez ditugu ondoan ikusten une larri hauetan”. Eusko Jaurlaritzari Gallardo Taldeari emandako 5 milioi euroak berreskuratzeko eskatu diote, eta Gipuzkoako Diputazioari, BEZaren 2 milioiko ordainketa berehala exijitzeko.
