Kataluniako Gobernuak erreskatea eskatu dio, gaur eguerdian, Espainiako Gobernuari. Horretarako, Autonomien Likideziarako Funtseko 5.023 milioi euro galdegin ditu —18.000 milioi eurokoa da funtsa—. Francesc Hom Kataluniako Gobernuaren bozeramaileak esan duenez, "zor publikoari" eta "aurten amaituko diren hainbat zorri" aurre egiteko behar duten dirua da. Bien bitartean, likidezia arazoak izan ditzaketela onartu du.
Era berean, Homsek agindu du laguntza horren trukean ez dutela "inolako baldintza politikorik" onartuko, izan ere, "funts hori kataluniarrena ere badelako". Argi utzi nahi izan du horregatik jo duela Espainiara eta ez Europara: "Espainiari erreskatea eskatzea edo Europari eskatzea gauza desberdinak dira. Guk eskatu dugun dirua Kataluniako herritarrek ordaindu dute, baina Espainiako Gobernuak kudeatzen du. Europako kasuan dirua ez da espainiarrena, beste herrialde batzuena baizik".
Artur Mas Kataluniako presidentea irailaren 20an bilduko da Mariano Raxoi Espainiako presidentearekin. Katalunia erreskatea eskatzen duen hirugarren erkidegoa da, Valentziak eskatu zuen lehenik, eta Murtziak ondoren.
