Konecta-BTOko langileen protesta Batzar Nagusietan

Gueñesen dagoen Konecta-BTO enpresako langileek Bizkaiko Batzar Nagusien aurrean elkarretaratzea egingo dute gaur, 11:00etatik eta 11:30era bitartean. Jadanik bi urte iraun duen lan gatazkari amaiera emateko, Bizkaiko Batzar Nagusietako alderdi guztietako ordezkariei neurri politikoak hartzeko eskatuko diete, «alderdi bakoitzaren hauteskunde interesei uko egin diezaietela». ELAko ordezkariek salatu dutenez, orain arte 80 lanpostu «suntsitu» dira Konecta-BTO enpresan, hau da, lantaldearen %25. Horietatik azken 11 kaleratzeak lan erreformari esker egin direla ere salatu dute langileek. Konecta-BTO enpresak Iberdrolarentzat lan egiten du, eta bezeroen arretaz arduratzen da.