Urtarrilaren 29an aurkeztu zuen 30 langile kaleratzeko erregulazio espedientea Igorreko (Bizkaia) Talleres Negarrak. Iragarri zuen otsailaren 28an botako zituela langileak. Sindikatuek eskatuta, bi aldiz luzatu du kontsulta epea. Alabaina, azkenean ez da kontsultak amaitu arte egon langileak botatzeko. Joan den astean, bi egun falta zirenean kontsultak bukatzeko, kaleratu egin zituen 30 langileak.
"Negoziazioek aurrera egin dute, baina inolako arrazoirik gabe, enpresak lehen esandakoei uko egin die eta kaleratzeak gauzatu ditu", salatu du Euskadiko CCOOk. 2012tik erdira murriztu da lantaldea Talleres Negarran. "Zuzendaritzak nahi du zuzeneko laneskua kentzea eta ekoizpen zentroa desagerraraztea".
Horrez gain, ordezkari sindikalen aurkako "jazarpena" gaitzetsi du CCOOk. Azken kaleratuetatik 16 CCOOko afiliatuak dira, eta horietatik hiru langile batzordeko kideak. Sindikatuak elkarretaratzera deitu du eguerdirako enpresaren egoitza aurrean.
