Hain zuzen ere, ezker abertzalearen inguruko taldeek handituko dute ordezkaritza gehien ostiraleko batzarrean. Egun hamabi batzarkide dituzte -zortzi Banatuz-ek, hiru EAE-ANVk eta bat LABek-, baina horiei beste bederatzi gehitzeko moduan egongo dira batzarrean. Izan ere, azken udal bozetan lortutako ordezkaritzaren arabera izendatuko dituzte batzarkideetako asko.
Efe agentziak egindako kalkuluen arabera, PSE-EEk gaur egungo hemezortzi kontseilariei eutsiko die, eta CCOOk bat irabazi, eta hamar izango ditu. Alternatibak hiru izango ditu, eta EBk bi -lau zituzten bien artean-. Aralarrek bat irabaziko du (bi). PPk hiru zituen, eta bakarra izango du, eta Pixkanaka-Kaxkari (bi) eta ELA(1) sindikatuek ordezkaritzari eutsiko diote.
Hautagaitza proportzionalak
Batzarra eratzen denean, administrazio kontseilua eta kontrol batzordea osatuko dituzte. Lehenengoak hamazazpi kide ditu, eta horietako zortzi ordezkatu behar dituzte. Kontrol batzordeak, berriz, zortzi kidetik lau berrituko ditu. Bi organo horietan, EAJk eta H1ek gehiengoa galtzeko ados jarri beharko dute beste talde nagusiek, eta ez dirudi erraza.
Banatuz-ek aurreratu duenez, bi hautagai aurkeztuko ditu administrazio kontseiluan bezeroak ordezkatzeko, horiek liratekeelako, bere iritziz, proportzionalki dagozkionak. Kontrol batzordean, berriz, hautagai bakarra aurkeztuko du ezker abertzaleak.
