"Langile ez-euskaldunak diskriminatzeagatik" Bordeleko epaitegi batek LABi hauteskunde sindikaletan lehiatzeko ezarritako debekua joan den astean bota zuen atzera Frantziako Kasazio Auzitegiak. Eta debeku hura eskatuz epaitegietara jo zuen CGTk, berriz helegitea jarri du LABen kontra.
CGTko Baionako batzordeak gaur gaia hizpide izan du enpresa txikietako hauteskundeei buruz eman duen prentsaurrekoan. Baionako ordezkarien arabera, haiek helegitearen kontra daude "baina konfederazioak erabaki du" hura aurkeztea; hots, eskualdeko CGTko departamendu batzordeena izan da helegitea ezartzeko erabakia, ez Baionakoarena.
Hala ere, Jacques Dassé Baionako CGTko idazkari nagusiak gaur erabakia nolabait babestu du hitzez: "Poitu Charentesekoa banintz LABen proiektua irakurrita kezkatuko nintzateke". Gainera, kazetariei erantzunez, CGTko ordezkariek onartu dute helegitea jartzearen erabakia politikoa izan dela.
Azaroaren amaierako hauteskunde sindikaletara aurkeztea debekatu zitzaionean, LABek hainbat hautetsiren babesa jaso zuen, baita CGTko kide askorena ere. Berriz ere auzibidera jotzeak CGTn izan dezakeen eraginaz kezkarik ez dutela esan dute ordezkariek; 10 bat kidek sindikatuko karta itzuli dutela azaldu dute, baina, aldi berean, azken asteetan izen emate anitz izan dituztela ere.
