Indiako multinazionalak Zumarragako Arcelor mugarik gabe itxiko duela iragarri ostean, eta kontuan hartuta Sestaoko ACB dagoeneko itxi egin duela, LAB sindikatuarentzat "harrigarria da benetan" prozesu honetan nola jokatzen ari den Eusko Jaurlaritza. "Enpresari bideragarritasun plana aurkezteko exijitu beharrean, Jaurlaritza bera da eta, ez enpresa, Zumarragako lantegirako bideragarritasun plana publikoki iragarriko duela dioena". Hau da, enpresa batzordeari jakinaraziko dio Lakuak "enpresa berari baino lehen", haren iritzia ezagutu gabe. "Eta hau guztia, gainera, astebeteko epe laburrean".
Horrengatik guztiarengatik, eta proposamenaren "xehetasunak ezagutzeko zain" dagoela, LABek "enpresarekin batera adostutako plana" dela deritzo Arantza Tapia sailburuak 15:30etik aurrerra batzordeari aurkeztuko dion hori. "Beldur gara Jaurlaritzak enpresak aipatutako arrazoiak bere egingo ote dituen, hainbat langileren leku-aldatzeak ontzat emanez". Plan horrek Zumarragako altzairutegiaren "gainbehera bultzatu eta langileen sakrifizio gehiago exijituko" duela uste du sindikatuak.
"Hala balitz, plan horrek Enpresa Batzordeak zein Zumarragako herriak berak erabakitakoaren aurka zuzen-zuzen joko luke", erantsi du LABek.
