Bazkide kooperatibistek beste urrats bat egin dute, gaur goizean, Fagor Etxetresnen porrotak Mondragonen barruan sortu duen egoerara moldatzeko. Donostiako Kursaal jauregian bilduta, Lagun Aro BGAEren (Borondatezko Gizarte Aurreikuspenerako Elkartea) batzar orokorrak bi erabaki hartu ditu, duela berrogei egun BERRIAk aurreratutakoaren ildotik.
Batetik, desegite prozesuan dauden kooperatibentzat erretiro aurreratuko prestazioa hobetzea onartu dute:saria 55 urtetik aurrera, kontsumoko aurrerakinaren (soldataren) %80 jaso ahal izango dute. Orain arte %60 zegokien.
Bestetik, Fagorren porrotak behin-behinean lanik gabe utzi dituen kooperatibisten langabezia sariek Lagun Aro BGAEren kutxak hustu ez ditzaten, bazkideek ontzat hartu dute sari horretarako kooperatibek jartzen duten kuota igotzea. Urteko laneko aurrerakinen gaineko %1,5 izango dela azaldu du Lagun Arok. Hau da, langile bakoitzaren lan kostu osoa %1,5 igoko zaie kooperatibei.
