Eusko Jaurlaritzako Lan Ikuskaritzak aurtengo lehen seihilekoko jardueraren berri eman du. COVID-19ak baldintzatutako ezohiko hilabeteotan, 10.797 ikuskaritza ekintza egin dituzte, horietatik 5.682 laneko iruzurraren aurkako borrokari lotuak, eta %34,5koa izan da eraginkortasuna: 1.959 kontratu aldarazi ditu Lan Ikuskaritzak.
Horietatik %15 inguru lanaldi partzialekoak ziren —lanaldi osokoak dira orain—, eta bi herenek (%66,39) emakumeei eragiten zieten. Guztira, 458.820 eurokoa zen kontratu horiek eragindako iruzurra.
Jaurlaritzaren erakundeak koronabirusaren ondorioz sortutako egoerari aurre egiteko abiatu dituen kanpainen berri ere eman du. 551 ekintza egin dituzte lanean segurtasun baldintzak betetzen zirela bermatzeko, eta bi zehapen espediente soilik aplikatu dituzte. Guztira 147 enpresa aztertu dituzte; Lan Ikuskaritzak ohi baino lan gehiago izan du lantokietako segurtasun baldintzen kontrola egiterakoan.
Legegintzaldian, 18.300 aldaketa
Maria Jesus San Jose Jaurlaritzako Lan eta Justizia sailburuak joan den legegintzaldiaren balantze bat ere egin du. Kanpaina horretan 18.300 kontratu aldarazi ditu Lan Ikuskaritzak: «Oso emaitza onak dira; laneko iruzurraren aurka ekiteko erabaki irmoa izan da legealdi honen ezaugarrietako bat».
