Akordioak, beraz, Eusko Jaurlaritzak enplegu politika propioak egitea galaraziko du. Sindikatuko idazkari nagusiaren esanetan, orain «Euskadi Espainian are gehiago txertatu» dute, eta negoziazioaren garaile nagusia Zapatero izan da: «Lopez jokoz kanpo utzi izanagatik, ez da akordio ona; horretan eta beste hainbat kontutan dago jokoz kanpo lehendakaria».
Lopezen aurreko Eusko Jaurlaritza guztiek izandako «jarrera komuna desegin» dute orain, eta autogobernuari kaltea ekartzeaz gain, aurrekontuetan ere transferentziak eragin negatiboa izango duela ohartarazi du Mikel Noval ELAkopolitika sozialeko arduradunak. Izan ere, enpresaburuek jasotzen dituzten hobarien kudeaketak «galera ekonomikoak» eragingo dizkio Lakuari.
Muñoz eta Novalekin batera, ELAko ikerketa bulegoko Janire Dominguezek hartu zuen parte atzo, Bilbon, lan politiken eskualdatzearen inguruan sindikatuak eginiko txostena aurkezteko agerraldian.
Porrot egin duen eredua
EAJk eta PSOEk eginiko akordioak, halaber, Kontzertu Ekonomikoak zehaztutako finantziazio irizpideak apurtuko dituela ohartarazi du Muñozek. Enplegu politiken barruan, kotizazioak biltzeko eta langabezia sariak kudeatzeko ahalmena ere lortu beharra zegoelako, hain zuzen ere.
Transferentzia honek langabezia gutxitzeko baliorik ez duela izango ziurtatu dute, «dirua porrot egin duen ereduan gastatzeko esan digute, langabe gehien sortu dituen horretan». Era berean, enpresaburuen hobariek «lanpostu bakar bat ere ez» dutela sortuko nabarmendu du Novalek. Elkarrizketa sozialean parte hartzen dutenen artean banatzeko, alabaina, haien artean «oso eskuzabalak» izango dira. Eskumena lortzearen truke, bestalde, EAJri Europako Batasuneko aurrekonturik «antisozialenak» babestea egotzi diote.
Popularren kezkak
Sindikalgintzak eginiko salaketa zuzena dela ondorioztatzen da Patxi Lopezek atzo esandakoaren arabera. Izan ere, lehendakariak aitortu du enplegu politiken eskualdatzeak emaitza negatiboa izan dezakeela Euskal Autonomia Erkidegoarentzat. Edonola ere, oraindik datu zehatzik ez dagoela ziurtatu du, emaitzak Gizarte Segurantzaren Altxortegiak emango dituelako enpresaburuei emandako hobarien zenbatekoa aztertu ondoren. Emaitza negatiboa izango balitz ere, eskumena ez duela geldiaraziko ziurtatu du.
Kontrakoa eskatu du PPk eta, horregatik, Euskadirentzat kaltegarria izanez gero transferentzia berriz negoziatzeko galdegin dio Leopoldo Barreda PPko bozeramaileak Lopez lehendakariari. Horrez gain, eskumenaren benetako balioa argitzea nahi du, «EAJk eta Zapaterok negoziatzen duten guztietan euskaldunok gehiago ordaindu behar dugulako».
Argigarriak
Enplegu politika aktiboen eskumena aztertuta, ELAk honako ondorioak atera ditu:Enplegu politikak eskualdatuko al dira? Ez, politika horien irizpideak ezartzeko ahalmenik ez duelako izango Eusko Jaurlaritzak, kudeatu baino ez ditu egingo. Erabakitzeko ahalmenak Madrilen jarraituko du.
Langileen kotizazioak Gasteizek kudeatuko al ditu? Ez, soldaten %0,7 enplegu eta trebakuntzarako doa, baina Espainiako Gobernuak biltzen segituko du Gizarte Segurantzaren bidez. Kontzertu Ekonomikoaren oinarriaren aurka doa.
Zer gertatuko da EAEko kotizazioekin? Kasurik onenean, Espainian bildutakoaren %6,24 emango diote Jaurlaritzari, baina hori kotizazio guztien zati bat besterik ez da. Horrek galera ekonomikoa dakar Lakuarentzat.
Langabezia sariaren kudeaketa eskualdatu al da? Ez, enplegu politika pasiboak kudeatzeari uko egin zaio, langabezia sariari zein gainerako laguntzei.
