Eusko Jaurlaritzak negoziazio prozesuan duen jarrera "itxia" salatu dute Lanbideko langileek. ELA, CCOO, LAB eta UGTk deituta, manifestazioak egin dituzte arratsaldean, eta adierazi dutenez, zerbitzu publikoaren kudeaketa "negargarria" izan da hura martxan jarri zenetik.
Soldaten jaitsierak salatu dituzte, eta mobilizatzeko beste hainbat arrazoi ere zerrendatzen dituzte: nahitaezko lanpostu lekualdaketak, formazio zentroen desagerpena eta aldi bateko langileak kanporatzea, besteak beste. "Horrek guztiak Lanbidek eskaintzen duen zerbitzua hondatzea dakar, eta zuzenean egingo die kalte herritarrei", azaldu dute.
Haien arabera, Jaurlaritzak Espainiako Gobernuaren erreforma "atzerakoienak" ezartzen ditu, eta, ondorioz, langileen "lan baldintzak okertzen" ari dira.
