Langabezia tasa %6,44koa da Hegoaldean, INEren arabera

Hego Euskal Herrian iaz baino 12.400 langabe gehiago zeuden irailaren amaieran. Aurtengo bigarren hiruhilekoan baino 12.700 gehiago. Guztira 89.400 langabe daude bertan, eta langabezia tasa %6,44koa da, Espainiako Estatistika Erakundeak (INE) emandako datuen arabera: %7,78koa da Bizkaian, %7,09koa Nafarroan, %4,80koa Gipuzkoan eta %4,24koa Araban.

Duela urtebeteko datuekin alderatuta, 9.900 gizon gehiago eta 2.600 emakume gehiago daude langabezian. Emakumeen langabezia tasa %7,62koa da, eta gizonena, berriz, %5,53koa.

Langabeziak sekulako hazkundea izan du Nafarroan: aurtengo hirugarren hiruhilekoan bigarrenean baino 4.800 langabe gehiago daude, %27,32 gehiago; iazko datuekin alderatuta, 8.900 pertsona gehiago daude langabezian, %66,83 gehiago. Bizkaian langabezia %21,5 handitu da aurreko hiruhilekoaren aldean.

Sexuari dagokionez, langabezia %26,5 igo da gizonetan eta %8,9 emakumeetan. Eraikuntzan 9.000 lanpostu galdu dira azken hiruhilekoan.

Eustatek, EAEko estatistika erakundeak, astelehenean eman zituen langabeziari buruzko datuak, eta alde handia dago Eustaten eta INEren datuen artean: Eustaten arabera, langabezia tasa %3,5ekoa da Araban, Bizkaian eta Gipuzkoan; INEren arabera, aldiz, %6,27koa. Eustatek dioenez,35.500 langabe daude; INEk dioenez, aldiz, ia bi aldiz gehiago: 67.300.

Aldea ikusita, UGTk zenbakiak «itxuraldatzea» leporatu dio Eusko Jaurlaritzari: «Nabarmena da Eustaten zenbakia errealitatetik urrun dagoela, EAEn 56.000 lagunek kobratzen baitituzte langabezia prestazioak».

LABek eta CCOOk ohartarazi dute krisia hasi dela Euskal Herriko ekonomia produktiboan eragiten.