Langile bat hil da gaur Abadiñon eta beste bat larri zauritu, txatarraren makina paketatzaile batek harrapatuta, Ertzaintzak jakinarazi duenez. Estampaciones Bizkaia, Lebario industriaguneko lantokian izan da ezbeharra, 11:30ak aldera. Gizonezkoa da hildakoa: Juan Manuel Garcia Chicharro, 49 urtekoa. Azpikontratatutako Metso enpresakoa zen.
Zauritutako langileak lesio larriak dauzka bi hanketan, eta Gurutzeta Barakaldoko erietxera eraman dute, helikopteroan. Estampaciones Bizkaia langilea da, gizonezkoa, 45 urtekoa.
Langile batzordeak 24 orduko lanuztea deitu du, eta bihar 12:00etan enpresaren aurrean bilkura egingo dute. 11:30ean, batzarra.
LAB sindikatuaren datuen arabera, aurten Euskal Herrian lan istripuetan edo lan baldintzen ondorioz hil den 44. behargina da gaurkoa. Iaz horrela 82 langile zendu zirela dio LABek, duela bi urte 85, 2008an 112, 2007an 125.
