29 urteko gazte bat hil da Meñakan (Bizkaia), hondeamakina batekin baso lanetan ari zela.
Ertzaintzak jakinarazi duenez, istripua atzo gertatu zen, 18:30 aldera. Azalpenen arabera, Meñakako baso batean ari zen lanean gaztea.
Osalanek argitaratutako informean dioenez, zuhaitzak mozteko makinari pieza bat aldatu nahian zebilen ezbeharra gertatu zenean. Enborraren neurria hartzen duen detektorea zen gazteak aldatu nahi zuen pieza. Ez dakite zergatik, baina makinaren mordazak itxi egin ziren bat-batean, langilea erdian harrapatuz. Osalanek ikerketa lanetan darrai.
Bi egunean Bizkaian gertatutako bigarren lan istripu larria da. Izan ere, duela bi egun beste langile bat hil zen, Deustua auzoko obra batean ari zela.
LAB sindikatuaren datuen arabera, 37 langile hil dira aurten.
