LAB sindikatuak jakinarazi duenez, langile bat hil zen atzo arratsaldean Amurrion, Tubacex enpresan. Eusetek Gas enpresako langilea zen, eta labeak garbitzen ari zen, azpikontratatuta. Bero handiko gune batean zegoen, eta, halako batean, ondoezik sentitu, eta konortea galdu zuen. Basurtuko Ospitalera eraman zuten, eta han hil zen. 59 urte zituen.Langile horren heriotza dela eta, Tubacexek "atsekabea" adierazi du ohar batean. Zehaztu du, "zantzu guztien arabera", "heriotza naturala" izan dela, baina ez duela baztertzen langilea egiten ari zen lanaren edo zituen lan baldintzen edo inguruaren ondorio izatea heriotza. Argitu du, hori bai, langilea ez zela ari "estres termikoko" baldintzetan.
Tubacexen aurten hil den bigarren langilea da. Uztailean, Laudioko lantegian hil zen beste bat, pisu handiko pieza bat gainera erorita. Tubacexeko ordezkari sindikalek Aiaraldea-ri orduan ziurtatu ziotenez, istripua prekaritatearen ondorio zuzena izan zen uztailekoa. "Egoera jasanezina da Tubacex lantegian", azaldu zuten. Duela bederatzi urte, beste lan istripu hilgarri bat izan zen lantegi horretan.
