Babcock Powerrek bere langile guztien lanpostuak desagerrarazteko erregulazio espedientea aurkeztu du gaur. Enrique Izquierdo langile batzordeko presidenteak jakinarazi duenez, 400 lanposturi eragingo lieke erregulazioak, eta sindikatuek eta langile batzordeak gaur eta bihar aztertuko dute. Orain hilabeteko epea dute helegiteak aurkezteko.
Babcocken nagusi zen enpresak (A-Tek) hondoa jo zuenetik, hainbat protesta ekintza egin dituzte langileek, eurentzat irteera bat bilatzeko.
2001ean Babcock lehen aldiz pribatizatu zutenean lanean ari ziren langileei beste lan batzuetan aritzea eta aldez aurretik erretiroa hartzea eskaini die SEPIk, baina langileek bermeak nahi dituzte, eta pribatizazio horren ondoren lanera sartu ziren langileentzat ere nahi dituzte baldintza horiek.
